金魚缸每日傳聞多多，熟真熟假只有缸湖中人至清楚，是日同大家分享兩則本周中環至hot傳聞，收咗市不妨鬆一鬆猜吓邊單真邊單假！

傳聞1.民營傳媒大亨被禁返北京

呢單直頭俾中環基金佬開埋名指名道姓講，講緊嘅係星美國際（198）同星美文化（2366）嘅大老闆、有民營傳媒大亨之稱嘅覃輝，話佢已經被禁止踏足北京，已經傳咗成個禮拜，所以星美系噚日路演，班fund佬兜口兜面質問係咪有咁嘅事，事關星美系嘅總壇喺北京，傳聞屬實就真係好大鑊也。不過，我哋打電話問過老覃，佢話無啲咁嘅事，啱啱喺上個星期至喺北京搞咗壇大製作（仲有圖有真相），佢又話呢幾年為咗屋企同公司，不停穿梭北京、新加坡、美國同香港，根本無停過亦無地方入唔到境…..

傳聞2.線人累街坊

上周某大集團有大deal公佈，傳聞事發當日嘅早上消息已經開始走漏，春江鴨撲入買相關嘅衍生工具，點知基金佬唔buy，正股同輪全線冚旗，「輸輪死」嘅大有人在，截至今日收市為止，中環班經紀勁埋怨話線人累死。