素來話自己帶領潮流，掀起勢頭嘅長實，密謀突擊，開賣長沙灣泓景臺二期。噚日開記者會介紹物業資料，重擺明車馬話，會用「截胡價」開售。至於會唔會低過1期底價1,579,000元，執行董事趙國雄就三番四次拍心口話：「總之好吸引啦！」。
謎底呼之欲出
佢哋諗住攞到售樓紙後，搞個「截胡價」競猜遊戲。睇樓者只需填寫表格，估吓今次最平嘅單位售價，估中就可以用5%折扣價，買任何一個單位。
個價錢謎面係1,XXX,XXX元，趙生透露，最尾三個位係0。站喺買家立場，當然希望係1,000,000元啦，但長實當然想係1,999,000元啦。不過，估計最後會係中間落墨。趙生重畀咗個「貼士」大家，個售價係好意頭嘅數目。蘭西估嗰三個位，一定有一個8字啦。
除咗鬥價錢外，近排好興用強勁宣傳吸引買家視線。新地日前播放耗資成五百萬元製作嘅珀麗灣短片後，長實就為泓景臺二期整咗段長兩分半鐘立體動畫數碼影碟（DVD），會派畀睇樓人士。
立體動畫舞台
同時，為咗進一步標榜個盤嘅十八萬方呎湖泊園林優勢，佢哋「靜靜雞」喺黃埔家居庭售樓處，整咗個出人意表嘅立體動畫舞台，好快就會開放畀大眾睇啦！
代理重本sell珀麗
馬灣珀麗灣啱啱開放葵芳新都會廣場示範單位，各代理行即刻喺附近展開埋身肉搏。鴻運喺葵芳地鐵站內租咗地方做資訊中心，用圖片、宣傳單張及錄影帶推介珀麗灣，今日重搞埋開幕剪綵儀式。呢個資訊中心會租到珀麗灣賣完為止。咁地鐵都好肥仔喎！
利嘉閣就喺新都會廣場隔籬葵涌廣場，設咗個珀麗灣全方位展銷廳，重安裝咗直升機模型，中間擺部電視，播放珀麗灣海陸空全攻略影片。蘭西聽聞，呢個展銷廳係以日租計。由於反應幾好，吸引到唔少人，重收到唔少票，所以利記大概會租一個月。計埋其他支出，要成二十萬。
其實新地原本已經喺新都會廣場7樓，撥咗啲地方出嚟畀各代理行擺檔，但佢哋都覺得唔夠，所以要搵其他地方搞宣傳吸客，可見代理幾咁重視珀麗灣，新地雷霆應該可以放心啩？
代理除咗另租地方搞宣傳之外，都有大力推動員工去搵客。好似美聯主席黃建業，就親身去到珀麗灣示範單位，為美聯同香港置業員工打氣。重特別喺兩公司嘅風褸上面簽名，準備送畀做到最多成交嘅分行主管，等啲員工博到盡。
下個禮拜珀麗灣現樓示範單位就會開放，睇嚟各代理行到時又要面對新一輪競爭，要再諗計突圍。