上個禮拜失驚無神真情剖白咗同大股東黃光裕嘅關係，國美（493）主席陳曉噚日突然再嚟料，將行政總裁CEO個位交畀副總裁兼執行董事王俊洲，自己只係留番做主席同執董，官方解釋話係因為國美已經度過咗危機喎……危機係乜嘢？華華估唔到，但睇嚟市場對呢單「人事變動」無乜反應噃，至少，冇驚動到個股價先吖！
大佬功成身退畀啲細嘅上位，咁王俊洲又有咩來頭呢？記得仲係黃光裕掌權嘅年代，佢都算係黃氏嘅左右手，經常負責代老細應酬華華同班行家，所以，當貝恩聯同陳曉攞到控制權，成個「媽屐」都估佢一定要起身，點知，勢估唔到響老黃判咗刑之後，佢唔使走不特止，仲可以再上層樓㖭！

王俊洲上位　被讚有默契

咁單位話事人陳曉對於今次「突變」又點解畫？佢響國美新聞稿度話，經過過去幾年同王俊洲合作，佢哋已經建立咗深度嘅尊重同互信，同時亦磨合出默契，仲話呢個世界上除咗王俊洲，無人可以更勝任做國美總裁。
嘩……嗰種相逢恨晚，直頭有種「非君不嫁」嘅感覺！不過，咁亦凸顯咗王氏已經順順利利轉到新馬房！
話時話，華華八到，查實條街普遍係希望貝恩同陳曉一方可以順利接管國美，皆因佢哋想法較單純，而且目標清晰，只係為咗一個字──錢！咁又係呀，散戶買隻股為咩唧，都係為個「錢」字咋嘛！

李華華
mailto:[email protected]