韓國女團AOA成員草娥噚晚於Instagram留言表示為咗治療失眠及抑鬱症而決定退團，不過今早就有韓媒爆出一輯草娥跟緋聞男友同遊日本後返韓嘅照片，暗示草娥健康根本冇問題，疑似係因為戀愛大過天先選擇退團。

早前已有傳草娥跟大佢5歲嘅羅津產業CEO李錫鎮拍拖，男方係AOA粉絲，佢於草娥事業低潮時給予好多安慰，二人去年更於男團Super Junior成員金希澈牽線下而發展成情侶，當時AOA所屬嘅FNC事務所已否認戀情，不過今早韓媒就公開草娥跟李錫鎮於上月9日、喺日本東京羽田機場飛返首爾金浦機場嘅照片，雖然當時仲有兩名女性同場，不過網民就猜疑女友人只係煙幕，更有網民留言猜測草娥退團可能係因為墮胎、要結婚等，更有人表示草娥今年開始就疑似戴上結婚戒指。

照片公開後，草娥今早於Ig公開跟兩名女友人嘅合照，留言表示：「我冇懷孕、冇墮胎，亦唔係為咗結婚而退出組合。」草娥表示當時跟好姊妹首次一齊出國旅行，過程中曾向李錫鎮諮詢不少事情，因此後來男方都得閒，就直接為三人擔任導遊。

草娥又解釋因為回韓時太夜，可能係於男方送返屋企時被拍下二人單獨照，又強調：「有好多即使熱戀中仍好好活動嘅偶像，如果我想戀愛，只要公開後繼續活動就好，我唔明點解要將我退團歸咎於戀愛。」

而FNC今早就回應，公司尊重草娥嘅意向，不過係現時立即退出抑或之後先退出，當中仍需要跟草娥討論相關細節，FNC有最終決定後會再發聲明。