錢國偉設靈丨吳婉芳現身祭故友 許志安延續Wilson開心精神
蘋果日報 2020/12/08 23:27
錢國偉吳婉芳許志安胰臟癌張衞健
於今年10月病逝的無綫前監製錢國偉（Wilson），今日在沙田寶福山設靈，多位圈中人特地到場致祭，與Wilson識於微時的凍齡港姐吳婉芳都有現身送別故友。吳婉芳一身素服到場，她一落車便急急腳入靈堂，未有受訪。Wilson生前曾經在不少訪問上表示，他與李克勤、鄭伊健、吳婉芳、李家聲、梁佩瑚等人特別好感情，其後結義，多年來一直互相扶持。
另外，張衞健、許志安及蘇永康先後到靈堂向Wilson道別，他們離開時受訪，其中張衞健指：「Big Four演唱會係Wilson一手包辦，喺香港紅館，甚至到外地都係Wilson監製，所以我哋建立咗好深嘅友誼，好感激Wilson示範點做一個勇敢嘅男人，點樣去愛身邊嘅人同屋企人，佢係身體力行嘅，都會同我哋講佢點去做。」問到加Wilson在內是否變Big Five，蘇永康同意說：「可以咁講，長埋喺我哋嘅心中。Big Four喺樂壇同藝術有小小成就，其實Wilson作為一個領軍人物係功不可沒。當初構思Big Four嘅時候，大家都係諗搵邊個監製好呢？最後大家嘅意屬都係Wilson囉！」張衞健更形容如果Big Four是身軀四肢，Wilson便是大腦，他希望Wilson的家人可以振作。
至於許志安則謂：「好掛住佢，Wilson係個開心嘅人，我哋會將佢嘅精神延續落去。」
吳婉芳今日坐車到錢國偉喪禮，急急腳入場。
吳婉芳祭故友後，未有受訪便離場。
張衞健陪許志安出席錢國偉喪禮。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！