【睇通睇透】拉倉養壯 成才佳兆(魯賓遜)
睇通睇透成才魯賓遜方嘉柏
今季華籍騎師成績優異,潘明輝及何澤堯在騎師榜更名列前茅,表現仲好過大部份外籍公司騎師。今期(28日)谷草日賽,有五位騎師停賽,遂令華將上陣機會大增,何澤堯更手執重兵,其中第三場「陽明亮亮」有力打開勝門。
第三場四班1200米,「陽明亮亮」外地曾勝出試閘,成熟已經足夠,前仗田草1200米首次上名,只敗給升班亦跑得好的「安喜」,今仗轉跑谷草,對手實力較低,排位有利而且負輕磅,有條件打開在港勝利之門。
第八場三班1000米,「成才」暑期轉投方廐,今季馬身肌肉變壯,體重明顯增加了幾十磅,上仗跑田草1200米,末段造22秒83,衝勢仲好過「英勇大師」,後勁前所未見,表現明顯進步,愛爾蘭四歲馬進度漸入佳境,同父馬擅跑谷草,今仗轉場出擊,部署滿肚密圈。