梁振英宣佈唔爭取連任嗰刻開始，香港曙光再現，日前男神王宗堯同師妹陳詩慧應本報邀請去車公廟為港祈福，代本報為港求籤，宗堯求籤前神色凝重：「有好多關口要過，無論係環境又好，生活又好，上樓呀，甚至教育，好多問題都好迫切，雖然我唔可以代表所有嘅人，但係我喺呢度都好希望，為香港求一支好籤。」
果然，宗堯求得十六號上籤：「惡強無如惡者強，福者自是福人嘗；人來纏害還自害，不怕傍人說短長」，即場忍唔住高聲呼叫：「好開心，勁緊張，見到香港呢支上籤，諸事大吉，我見到第一句已經好正，嚟緊香港會好番好多，我哋香港人想有屬於自己嘅地方。」

問姻緣好事近

特首選舉如箭在弦，宗堯睇好邊一個？佢話：「天氣咁凍，咁梗係唔想淋病喇！淋病過年好辛苦，又食唔到嘢，又拜唔到年，𢭃唔到利是，最好更加唔好有葉劉嗰啲，有瘤又唔係幾好，你話有層樓揸係手就好箒，嗰啲葉劉，真係好大鑊，新年梗係身體健康，有錢喇！香港唔可以冇錢，有錢就最好喇！會秉持公道嗰啲人都幾好，有錢又食到薯片就最開心。」
除咗為港，被甩拖嘅宗堯都有求自身籤，得七十一上籤，講姻緣意旨「好事近」，佢苦笑話：「就算係都希望係正桃花啦！其實都只係希望順順利利就OK。」
撰文：馮仁昭