【蘋果X檔案】中資保險公司挾港人資金當提款機 苦主投保800萬焗供：唔係我冇錢畀，係你哋信唔過
蘋果日報 2020/06/08 00:00
大新泰禾保監局
內地上市民企泰禾集團近月陷入財務危機，旗下保管香港人保險資金的泰禾人壽更險成提款機。港人Calvin（化名）過去1年經大新銀行投保6張泰壽保單、涉資800萬港元，坦言當初投保全因信賴香港銀行及金融制度，豈料背後中資母企竟陷入財困，此刻退保僅可取回4成已繳保費，倒蝕230萬元，揚言以後不沾手中資金融產品。
Calvin直斥，保監局至今未交代泰壽財政狀況，投訴熱線更是永遠無法接通，「我買保險都要畀levy（徵費），收咗錢冇做嘢點得」。
泰禾投資2017年以106億元向大新銀行收購壽險業務，並簽署獨家銷售協議，改名為泰禾人壽繼續在港營運。泰壽理論上獨立於同系的泰禾集團，但隨着後者財政狀況去年起急轉直下，遭評級機構穆迪下調評級至「Caa1」垃圾債級別之餘，主席黃其森更被列入欠債不還的「失信名單」，集團一度企圖伸手收購泰禾人壽撲水救亡。
雖然最後收購計劃未成事，泰壽亦表明自己完全獨立、未有投資泰禾債券及產品，但始終未能釋除本港投保人對其財政狀況的疑慮。根據保監截至2019年數據顯示，泰壽去年新造保單保費收入有17.3億元，涉及8,170份保單。當中7,428份保單由港人購買，佔比高達91%。
泰壽人壽行政總裁余健南早前向外解畫時僅強調，公司償付能力充足率達監管要求，無因集團面對資金困難而有所影響。
泰壽其中一名大額投保人、從事飲食業的Calvin接受本報訪問時指，2018年於大新銀行開戶口時，其客戶經理大力推銷泰壽儲蓄保單，聲稱每年有3至4厘回報。有見資金閒置，加上經理不斷推銷，他先後購買6份泰壽儲蓄保單，總投保額達800萬港元，原意為女兒日後海外升學作準備。
「本來諗住錢放喺銀行無利息，不如踏踏實實同保險公司買份保險，當時覺得係好穩陣。」他指，自己本身亦有於其他保險公司投保儲蓄單，故對同類保單已有基本概念，未有深究產品背景。
「只知道（泰壽）前身係大新人壽，諗住信你大新銀行品牌，見經理又話幫幫手買份追quota，就先後買咗6份，已經交咗近半保費，大約400萬元。」不過，隨着近月泰禾財困消息甚囂塵上，Calvin相當質疑泰壽的財政狀況能否理履行保單責任，一旦需要賣盤撲水救亡，手上保單或頓成廢紙一張。故此，他於兩周前主動聯絡大新及泰壽了解退保安排。
投保一年退保 倒蝕230萬元
「我落分行問過，話係你單方面取消，唔關公司事，如果依家退保，足足要蝕29萬美金（約230萬港元）。客服就話照供啦，我哋唔係同一公司，財政無問題，游說我繼續供款。」不過，Calvin直言是「等於傻咗嘅人話自己無傻」。
「依家唔係我要用錢要拎錢，而係我對你泰禾無信心，所以唔想再供款落去，因為供款之後係唔知能唔能夠畀到合約內容嘅嘢我。你要比到投保人信心，就要披露財政數據，如果唔係我點有信心每年去供?」Calvin指，由於現時退保損失太多，只能「硬着頭皮供埋」，但經此一事對投資信心難免減少，日後接觸中資背景產品「真係要諗清楚」。
事實上，Calvin曾嘗試向保監局求助，惟有冤無路訴。「保監局電話係難打過有線！投保人都要問清楚應唔應該繼續交保費，但永遠都打唔到入去！淨係識收levy，但保障唔到投保人。」Calvin坦言，保監局作為監管機構，應該第一時間了解泰壽財政狀況，並向公眾透明、公開披露。
比較Calvin目前6份保單，除了當中兩份已一筆過繳付保費的保單，其退保現金價值較高外，其餘年供保單現時退保只能取回約一成已繳保費。一般而言，保單生效初期由於投資尚未生息獲利，加上要扣除管理費用、佣金等，故現金價值比例會較少。
保監局至今收數十宗有關泰壽查詢
泰壽發言人回覆本報指，2019年的財務報表已通過獨立審計程序並提交監管機構，公司一切業務運作如常，並將繼續履行包括保單權益、保證回報、客戶服務、理賠和核保上的所有合約責任，近期退保率亦沒有錄得顯著增加。
不過，保監局回覆本報時承認，至今共收到數十宗有關泰壽的查詢。該局建議投保人留意其保單的條款，以免因提早退保而蒙受損失，同時應仔細評估自己的財政狀況和需要才作出決定。
保監局又重申，不會評論個別保險公司的情況，但指一直密切檢視保險公司的償付能力，以確保它們能全面履行對保單持有人的合同責任。鑒於近日環球資產價格大幅波動，該局已加強這方面的工作，以維持市場穩定。
泰壽銀保拍檔大新銀行就回應指，該行有嚴謹內部指引，定期審視泰壽的營運和財務狀況。據理解，泰壽營運符合相關監管機構的要求，如客戶對所持保單有疑問，該行會跟據既定程序，就個別個案進行了解和跟進。
泰禾曾研收購 康宏一度停售泰壽產品
泰壽聲稱在財務及營運上獨立於泰禾集團，但泰禾集團上月曾在深交所發公告，擬透過發新股從泰禾投資手上收購泰禾人壽。有傳收購計劃受到保監局高度關注兼出手煞停，最終泰壽數日後急發聲明稱，母公司已停止研究是次資產重組的可行性，並決定中止重組所涉及的收購方案。
由此可見，泰禾財困問題一日未解決，同系泰壽難以獨善其身，保險中介康宏就一度停售泰壽保單。本報早前報道，康宏內部信件提到泰禾系內公司財務轉差，雖然目前未有任何資訊顯示泰禾人壽財務穩定性有問題，基於慎重考慮，決定自4月29日起停售泰禾人壽產品，直至獨立第三方釐清泰禾人壽的情況為止，並提醒理財顧問要向已投保人士解釋泰禾人壽的財務情況。
不過，據了解，康宏與泰壽高層會面後，現已復售產品。康宏發言人重申，會不時研究各種產品以確保符合顧客需要，但不會就個別產品作出評論。
傳有央企接盤 主席黃其森擬出讓第一大股東
泰禾集團為總部於福建的民企，主要從事內房發展生意，1996年由黃其森成立，2010年在深圳借殼上市，2017年是泰禾最風光的時期，該年樓盤銷售額衝破1,000億元（人民幣．下同），躋身內地首20地產商行列，主席黃其森故有「福建小地王」之稱。
不過，隨着泰禾過度擴張，2018年起業務走下坡，去年多次爆出債務危機，成為其中一間高負債、存在債務違約風險的地產商。截至今年3月底，泰禾總負債達1,321億元；而疫情更令公司雪上加霜，首季收入按年大跌94%，錄4.8億元，期內盈轉蝕，虧損達5.6億元，期內經營性現金流亦轉負。
公開資料顯示，黃其森個人持有的泰禾投資，持有泰禾集團48.97%股權，連同其妻及胞妹的持股，黃氏家族持有泰禾逾六成股權，為控股股東。由於集團負債纍纍，黃其森曾於今年4月被中國人民法院列入「失信被執行」名單，禁止進行高消費活動。
近日內地盛傳泰禾有央企接盤，其股價一度漲停。內地多間傳媒報道，泰禾最近一直在謀劃引進戰投事宜，黃其森有意出讓第一大股東位置，有望6月公佈方案。不過，有傳是買家之一的建發股份與廈門國貿已作出否認。
記者：陳洛嘉
-----------------------------
-----------------------------
內地上市民企泰禾集團近月陷入財務危機，有港人購買泰禾人壽保單希望退保。
泰禾系股權分佈圖。