美國唔少人因為工作關係，冇乜機會結識異性，好似嗰啲公司陽盛陰哀嘅IT人，侷住幫襯婚姻介紹所，或者透過「約會網站」搵另一半。
雖然上網夠快夠方便，但唔似得婚姻介紹所經常為客戶提供面對面諮詢，所以用戶人數持續下跌，反而婚姻介紹所嘅影響力就不斷增長。

latebloomer喺《MSN討論區》話：「我朋友參加過好多單身人士活動，又試過網上約會，但仲係搵唔到合適嘅男朋友，於是幫襯婚姻介紹所。間介紹所每次收500美元（約3900港元），提供5個對象畀客戶選擇，仲會派人上門，了解客戶嘅情況，唔啱揀到啱，當然──費用另計。」佢問其他網友：「你哋認為收費合唔合理？」
cat21回應：「500美金唔算貴，因為間介紹所提供嘅服務好貼身，好過著名交友網站Match.com同埋eHarmony.com嘅服務多多聲。」
不過，TheReflector就鍾意eHarmony同Match.com嘅收費比較平，佢話：「如果我未結婚，一定會喺呢類網站搵對象。5年前，好多人會覺得網上約會好怪雞，但時至今日，呢類約會已經好流行，仲成功撮合唔少夫妻。」
喺美國，社工出身嘅麗莎．克蓮琵特（LisaClampitt）係好出名嘅「紅娘」，佢創辦嘅婚姻介紹所VIPLife，連埋佢得兩個員工，但每年營業額有25萬美金（約195萬港元），最大嘅開支係租個1400平方呎嘅辦公室，同埋助理嘅人工。間介紹所有3種收費方式：3個月無限次介紹服務收費5000美金（約3.9萬港元）；6個月收1萬美金（約7.8萬港元）；1年就收1.2萬美金（約9.36萬港元）。