陳浩民、樊少皇、林子聰、錢小豪、劉觀偉等今日喺香港國際影視展出席「互聯網影視內容的發展與未來」發佈會。樊少皇喺台上表示早幾年曾諗，網絡電影比院線電影會爭啲，不過o依家只係換咗一個平台，製作上同電影係冇分別。

陳浩民同林子聰開設嘅聰民志製作公司，將同新片場影業合作4部電影，首部係《宋定伯》，陳浩民話：「4月尾開拍，因為呢部戲有水戲，所以要搵新景。」林子聰就話：「其餘3部未諗，因為通常部戲爆紅，就會開拍第2、3、4集，o依家網絡電影大約90分鐘，製作費過千萬，不過有太多對手，唔同院線電影得4、5部。」

陳浩民被封為「網絡影片點擊盟主」，應該唔擔心？佢話：「多得阿聰，我哋要keep住合作，上年點擊前5名，我哋佔咗4部。」會唔會加片酬？陳浩民話：「唔使加，多人睇就得。」

此外，對於上年10月陳浩民拍完大陸電影《鬥戰勝佛》，竟然收唔足錢，搞到要喺微博公開追數，佢表示：「搞掂晒，平息咗，好順利解決。」林子聰話：「都遲咗半年丫！」

精選娛聞，喺晒《娛果》
http://fb.com/appledailyent