三月九日見到報紙報道萬事達卡公佈「二○○六年MasterIndex女性成就指數」，十三個亞太地區中，香港嘅女性成就指數係72.99，排第八。菲律賓以90.9排第一，菲律賓三十幾年來有一位馬可斯夫人，兩位女總統（阿基諾夫人與阿羅約夫人），菲律賓女性係好威風嘅，何況大量菲傭出國工作，養起十幾二十萬菲律賓男人。
咁啱喺呢日睇到一位讀者陳先生來電郵話：
「你的看法本人也有同感，覺得香港的女性在白領工作機會往往比男性多，薪酬、工作前途等也在男性之上，君不見香港現在很多公司的Admin、HR、AC部門清一色是女性，這個現象左兄怎樣解讀呢？為何該些部門是女人天下？

最近有一些調查關於香港的女仔在香港找不到合適的男伴，原因是港男質素低，做人不夠成熟，寧願找其他地方男士或單身，她們盡踩香港男士，作為港男子的一份子，本人有百分般滋味。
香港的男士在工作（白領）機會上已被女士壓下去，現在又被香港的女士評為質素低，究竟香港的男士是否如此不濟？香港的女士是否真的很狂妄呢？香港的男士究竟出現了什麼問題呢？」
香港下一代男士出了甚麼問題，如何解決？實在高深得很，要請啲社會學家去研究。譬如昨日本欄講小N，就係例子之一，小N等等男仔，其實幾叻仔，只不過係缺乏Motivation（推動力），或者香港男仔啲家長要夾錢請邁亞密熱火隊教練PatRiley嚟香港辦工作坊，教吓啲男仔至得。呢位教練係陽剛型，唔少美國大公司請佢去培訓職員啲意志力、競爭意識。洛杉磯湖人隊教練PhilJackson，係陰柔型，鍾意講「禪」，有ZenMaster嘅外號，唔係幾合香港男士需要。
呢幾年來左丁山與不同公司行政人員開會，見到高層嘅多數係男士，但中高層嘅，女性佔壓倒性多數。相信十年以後，香港商界領導人會以女性為主，中高層全是女性天下，到時香港女性嘅成就指數，會追上菲律賓喇啩。