紙，真係包唔住火的。今年焦點新車之一嘅豐田86，原本安排於上周末才正式發佈，不過日本開售無耐已經在網上招來熱烈討論，更令代理提前運來一部作新車首映。點都好，代理當然唔會比個勢停下來，上周六於澳門舉行港澳地區發佈會，正當筆者前往澳門之時，就見到朋友的facebook上載了皇冠陳列室同步展出一台火紅色86，讓車迷近距離接觸，夠快無？

講番發佈會，除了請來86的首席工程師多田哲哉講解研發過程，更有澳門著名車手何漢強分享試車心得。豐田86在香港與澳門之定價相若，推出Sport及SportPlus版本，每款均設有手波及自動波版，售價由35萬幾至38萬幾。賣個關子，稍後《蘋果》〈私駕路〉就會送上車手試豐田86報告，萬勿錯過。另外，今次發佈會選址在充滿跑味的澳門大賽車博物館舉行，屬於澳門政府首次將賽車博物館借出予私人機構使用，分銷部總經理程展強先生仲大讚澳門政府效率快，由申請到傾掂只需三星期，過程暢順。若然問香港政府借場，真係唔知會唔會拖到下個龍年先批到。

記者、攝影：蕭漢祥
鳴謝：皇冠汽車