網上騙案真係無日無之!今日藝人胡渭康又發現自己嘅肖像被盜用，除咗用嚟開FB戶口，更疑製成假身份證呃人。

胡渭康噚日同今日喺FB都Po出一個周姓人士嘅fb戶口嘅對話，呢位周姓人士個fb嘅頭像同背景都係用咗胡渭康張相，佢講到:「這名缺德的人，盜用本人照片欺騙別人，連身份證也偽造，實在目無法紀，感謝網友提供資料，為免更多人受騙，請廣傳並舉報。」

胡渭康po出嘅對話當中，有位疑被騙，自稱係周姓人士「老婆」嘅人叫佢俾身份證佢睇，周姓人士傳咗一張身份證，上面張相明明就係胡渭康，而周姓人士同呢位女士嘅對話似乎涉及一啲金錢瓜葛。

今日胡渭康接受本報電話訪問，佢話：「係呀！有啲網友話番畀我聽，無用到我個名，佢叫XXX。」對方偽造身份證？佢就話：「應該係架！」有冇報警？胡就話：「但係佢只係用咗我啲相，其實我都問過朋友話好難做，我唔係受害者，有人用我啲相，大家知網上可以用我張相做profilepicture，但係佢可以話唔係我都得，佢又無用我個名，如果通過呢個account，有人受害，仲要有人喺網上搵到呢個人先可以告佢。所以我依家出嗰post等大家散播呢個消息出去，等大家警惕。」

咁慘咁咩都做唔到？胡渭康指：「公眾人物做唔到啲咩，我收到唔止一個訊息話畀我知，即係話多過一個人知道呢件事，唔知佢哋有冇受騙，其實短訊我嗰個朋友嘅朋友可以係受害者。」

怕唔怕自己聲譽受損?胡渭康就表示：「我好相信自己嘅聲譽，無咁容易一下打碎。」咁嬲唔嬲？佢話:「唔係用嬲唔嬲，都係嗰句，希望大家知道，世界上千奇百怪事，係越出越新。」覺得無奈?佢話:「「係架，只希望唔好有人受傷害，我睇嗰寫嗰啲嘢都係牽涉男女感情同金錢，唔想有呢啲事發生。」