港視主席王維基點解令梁班子咁驚而拒絕發電視牌？睇睇魔童親力親為sell網購，又真係會令離地官員望而生畏。話說HKTV Mall不時搞網購優惠，今個月嘅宣傳攻勢更加係盡地一煲，但有網民就喺facebook話喎，明明佢嗰區買嘢係送咖啡機，點知埋單忽然變咗送蜜瓜，最終魔童親自出手跟進解「蜜」，將危機化為呃like。話唔定有一日，維基會親自送埋貨都未定呀。
港視本月1號起大賣廣告狂攻網購，1至15日只要購物滿400蚊，就可以按所屬港鐵站獲贈不同禮物，例如住喺鰂魚涌站附近可獲咖啡機、香港站就有哈蜜瓜等等，點知「宋禮基」出師不利，有網民周日凌晨喺fb留言，「明明落單嗰吓都仲顯示緊係（送）咖啡機，轉頭埋咗單就變咗話送蜜瓜」，又話打去客戶服務部，對方又話要等相關部門回覆，質疑港視呃消費者，「王生，枉香港人咁撐你，$400就試到你點做生意，我圖都cap低埋，呢次唔搵記者做嘢我跟你姓」。

被讚最強售後服務

點知維基原來除咗閒來無事上高登，fb都係佢活動範圍，佢喺嗰位網民投訴冇耐就化身CS（Customer Service）用真名留言，先問對方結賬時點樣輸入地址，又叫對方告知定單編號，表明會跟進，一句"I need to sleep now. Will follow up with you tomorrow"（我瞓先，聽日再跟進）嘅誠意，成功俘虜唔少網民歡心。
結果嗰位網民噚日就收到港視電話，將個蜜瓜變番咖啡機，大批網民就大讚呢個係香港最強嘅售後服務，話明因此要幫襯支持吓；當然都有人質疑呢個投訴嘅網民係咪媒嚟㗎？

李八方
mailto:[email protected]