天時暑熱，梗係留喺冷氣地方最爽，食飽瞓，瞓飽再食過，米奇就身體力行，親身示範喇。話說昨日，住喺沙田禾輋邨嘅讀者阿敏，送完小朋友返學，就同朋友去禾輋商場2樓一間餐廳食早餐，坐咗冇耐，阿敏已經見到有隻老鼠喺地下閃過，但坐喺對面嘅朋友話見唔到，兩個人就繼續食。點知呢個時候，米奇就再出現喇！

「好大隻，完全唔驚人咁！」5分鐘之後，阿敏就喺牆邊嘅假草皮裝飾上面，見到隻肥嘟嘟嘅老鼠，「即刻冇晒胃口，毛管戙」。過咗大約15分鐘，米奇都唔係點郁，一副悠然自得嘅樣。之後米奇爬咗上牆，睇個款係嘆完冷氣，準備閃！職員拎晒架生準備去捉佢，結果米奇已經不辭而別，真係拜拜佢條尾。

阿敏話，由於禾輋邨嘅餐廳唔多，而呢間餐廳裝修算光鮮，又坐得舒服，所以一星期都幫襯三、四次，但朋友每次飲完咖啡都會肚痛，「我仲講笑話佢啲咖啡好有效喎」。經過今次，阿敏話以後都唔敢再去，「點知有冇老鼠尿流入食物，佢哋有冇咬過啲包㗎」。餐廳發言人回覆話，當日已安排洗潔同滅蟲公司，喺收舖後進行全店消毒，公司亦向管理處了解，對方話，近日都收到幾間商戶反映鼠患問題，會加強公眾衞生嘅工作，發言人話，暫時未知老鼠由邊度走入嚟，相信只係個別事件。

你敢爆，我敢獎！ 即Call《蘋果》24小時爆相爆片熱線 ：63836568