原本根據建制派盛傳嘅後政改「劇本」，政改否決後，北京同特區政府會開盡馬力狂砌泛民主派，但因為建制派甩轆加WhatsApp外洩，有泛民中人對花生友講笑，家陣建制派人人冇心機、北京特區政府又要求救火，應該冇時間砌佢哋，但唔代表泛民可以唔做嘢，佢哋都會傾吓後政改形勢，包括係咪全面唔玩2017年特首選舉，甚至連選委會選委都唔選。
該泛民同八方講，佢哋會傾吓之後泛民開嘅「退修會」議題，主要集中後政改定位，好似來屆立法會，泛民仲同唔同建制派喺委員會正副主席人選上協調，定還是好似今屆咁「全面開拖」？

或杯葛選委會

仲有就係要傾泛民2016年立法會選舉、2017年特首選舉入面，泛民點企位，例如立法會選舉係咪不協調？泛民又應唔應該派人參選特首？因為有泛民中人提出，若果真係唔派人選特首，咁就連選委會選委都費事選，無謂陪北京玩！但又有泛民中人認為，冇理由連選委會都唔選，咁好難同泛民支持者交代，特別係好多功能界別泛民支持者，始終認為泛民唔應該「去得咁盡」。
據花生友所知，泛民各黨派會就上述議題，先喺各黨內進行討論，到7月26日，佢哋會由早上9時半到6時，喺立法會大會開退修會，到時會聽各黨派意見，除咗泛民「飯盒會」議員，部份議員助理都會參加。

花生友