每次講到時裝，着墨多在設計師身上，而遺忘了背後那群無名製作者。其實，設計師與車衣女工，就如大腦與手的關係，沒有一雙巧手，根本變不出甚麼戲法。民社縫紉手藝合作小組的一班深水埗師奶與dialog的時裝設計師，正正就是這樣的關係，前者出主意，後者出技術，作品還衝向國際舞台，所以千祈咪睇小師奶能力。

記者：劉明慧
攝影：梁細權、周旭文

車工技術最煞食

民社（民協社會服務中心）縫紉手藝合作小組與dialog設計師的相遇，發生在06年3月，當時dialog設計師Dong，想找香港女工製作其設計，無意間找上民社的網頁，剛巧民社因搞攤位而要聚集深水埗區內的車衣女工，於是Dong立即跟民社聯絡，然後把一個興趣小組變成自家作業班底。縫紉小組最初得3位成員阿芬、阿蘭同阿金，後期再加入其他成員共6人。別看她們個個師奶模樣，她們擁有的正是卓越的車工技術，而dialog又正好要求做出獨一無二的手工服飾，於是兩者一拍即合。

回收物做材料

訪問期間，只見阿芬等人，與設計師Dong及Cassandra拿着碎布及設計圖研究，原來dialog的時裝，全用回收環保概念，Dong說：「我哋嘅作品全都是用回收嘅舊布作材料，以人手製作。好似早期合作做嘅手鏈，就是用回收嘅泳衣剪成一條條布，再包住木珠做成。」Dong解釋，公司除了在香港用阿芬等女工外，在馬來西亞、越南等都有同樣的合作形式，她會將自己的設計交給車衣女工，讓女工在家中製作，而分帳則以件數計。單看成品，完全想像不到全是用人家棄用的布碎製成。

英倫潮牌後勤

呢班車衣女不單止有收入有事業，還開始揚威海外，因為她們的作品曾參加海外時裝展。今年年中，民社搞深水埗本土工業展覽，搵咗縫紉興趣小組的阿蓉、阿芬及阿花與英倫品牌DaydreamNation的設計師Kay及Jing合作，將一件普通的衣服加上冷衫袖，衫腳加上拼布變成新衫，作為展覽用，其後這件作品還被拿去參加巴黎同倫敦時裝節。
訪問當日，阿蘭手拿的那塊有如百家布的作品，便是9月時曾由dialog的Dong拿到法國參加展覽。阿蘭笑笑口說：「呢塊布用咗10個鐘頭去整，喺上面加拼布裝飾，又要縫邊同底，用咗唔少心機。」

有人認同最開心

除了與設計師合作，小組最近就在龍墟、嘉道理農墟擺賣，用布碎做環保袋。阿蘭謂：「做呢啲小手工，最開心係有人欣賞同認同，而且又可以賺到少少錢，唔使只係做家庭主婦，成日坐喺屋企做家務咁悶，都幾開心。」

拼布變化多

說到天花龍鳳，還不及一睹作品實際，縫紉手藝合作小組就示範兩款簡單小手作，一顯實力。

百變拼布襟花

用不同的拼布縫合，變成一朵朵襟花，用作衫、裙、袋的裝飾，亦可加絲帶變成頸鏈，變化多端。

布珠頸飾

把不要的碎布包着木珠，就可以變成一條特別而型格的頸鏈。

街訪評語

陳太：

「若放喺地舖賣，相信會吸引更多人買。」

陳小姐：

「呢啲袋都唔錯，全用人手做好吸引。」

陳小姐：

「我覺得呢啲款式好適合OL用。」

dialog：fairtrade作概念

品牌由DongShingChiu及Cassandra創立，以fairtrade概念做設計，以環保物料作主要材料。除香港外，在馬來西亞、越南等都會以相同形式與當地婦女合作，現時在香港Fangfong和Cocktail，還有倫敦、東京及新加坡等都有銷售點。

http://www.dialogltd.net

DaydreamNation：主攻歐洲

品牌於一年前由姐姐阿Kay創立，修讀舞台設計的弟弟阿Jing畢業後隨即加入，06年得到日牌UnitedArrows總監賞識，將其產品放於店內出售，自此受到世界各地買手留意，現時銷售點遍及倫敦、巴黎、丹麥、比利時、西班牙等地。

http://www.daydream-nation.co.uk

後記

訪問期間，各成員都不時走來走去，個個拎住碎布和做好的作品交流，十足興趣小組。「Dong同Cassandra成日都有唔同創作，令我哋學到唔少新嘢同見吓世面。」阿芬笑說。而一直跟進縫紉小組的民社前職員盧小姐亦說，希望一班車衣女工可慢慢自行運作，就如布料一樣能recycle，將優秀的車工技術持續發展。

有興趣參加的人，亦可以透過民社或盧小姐聯絡（97135005）。