噚日華華同國產高檔礦泉水公司西藏5100（1115）CEO付琳（圖）食晏，順便試飲吓呢支香港冇得賣嘅神秘西藏水，感覺同外國牌子嘅冇乜分別。不過330毫升（仲細過大包裝維他奶）賣8蚊人仔，真係幾貴。點知付琳話，支水喺海拔四千幾五千米嘅西藏開採入樽，單計技術成本同運費，物有所值。
喺海拔咁高嘅地方做嘢，真係能人所不能。付琳話，搞上市嗰排，投行要去公司考察，一到埗已經有幾件bankers病咗。有德國工程師去到，雖然人冇事，但佢哋家鄉嘅大牌子手提電腦全部失靈。
付琳向有意去西藏嘅朋友提供小貼士，根據佢個人經驗，應該拎聯想嘅notebook去，因為佢從未出過事。國產貨打倒來路貨，付琳果然識講嘢！