今日同大家講下「投行sales的辛酸」。話說中資投行「G公司」有份承銷嘅IPO，盛傳將於下周末招股，但唔知咩原因，可憐班投行sales跑極，配售訂單似乎仲未到target，於是引起投行部的男高層Z先生不滿，大半夜喺WeChat group發難，指責承銷團人員搵唔到訂單，講到興起，仲寸組內女員工冇樣冇身材，「裸貸」都唔掂。

由於網上流傳嘅cap圖內容行文都係大陸用語，相信讀者睇完都唔知講咩，華華姑且翻譯下Z先生嘅金句：

「我未見過咁嘅團隊，已經瀨晒鞋底，但仍然咩都賣唔出，係點做到架？我哋組嘅sales已經賣咗好多啦。哎呀，成班勤力嘅老蜜蜂，平日用公司唔少錢，人又多，但一如既往無L用，係點做到架？一啲面都唔要呀？或者可以考慮下借錢（自己畀錢填數），裸貸要唔要諗諗？但你想裸貸都未必得，能力差都算啦，仲要冇樣冇身材。」

最搞笑係，Z先生鬧人之前，不忘抬舉自己一番，話自己畢業於上海交通大學，攞過一堆獎，喺雷曼兄弟、德銀等做過「臨時工」（FC：喺證監會搵唔到相關資料，呢位高層只係喺法巴做過半年，之後喺興業金融、三星亞洲分別做咗年幾，最終喺G公司落腳，做咗8年多）。

有group中成員睇唔過眼，鬧爆Z先生成個「怨婦」，而且有物化女性之嫌，要求Z先生道歉，當事人梗唔理啦。cap圖外洩後，Z先生仲發律師信要求刪除相關文章。

不過，成件事最引起花生友注目嘅係，近排隻隻新股都當炒，究竟係邊隻咁慘賣唔出呢？小道消息話係下周末招股嘅B股有關，自己上聯交所個網睇下。

李華華