吳鎮宇今日到柴灣接受ViuTV由陳海琪和陶傑主持節目《大星講》訪談，鎮宇為咗電影《逆流大叔》做咗好多宣傳，吸納咗一班觀眾好開心，不過電影效應帶挈收入同工作，鎮宇就話：「票房比上不足比下有餘，其他工作有先再算，獲得嘅咪呢啲訪問工作囉。」

有傳原班人馬再開另一題材電影，鎮宇表示冇聽過，開得成再算， 並指有向導演反映：「 我哋嘅故事唔可以延續，但又唔可以拍第二個種子 ，有啲人幾唔收得都厚顏無恥開第二集，趁我哋有啲觀眾緣，可以做下第二啲嘢。」題材方面就交由幕後負責，稍後鎮宇會開拍兩部電影。

今個暑假鎮宇爭取休息放下工作親子樂，佢話：「同阿仔一齊學音樂互動，陪住佢冇咁怕醜，阿媽就帶佢學空手道，本來一對一，後來團體上，總之阿媽教動態，我教靜態，我希望阿仔可以down to earth（務實啲），去學習對打，依家咁危險，等佢認識多啲，希望佢有興趣啦， 學完空手道可以食雪糕，可能佢係為咗杯雪糕，但運動精神好好緊要，令人質素改善，雪糕只係獎勵，但個人質素要培育先增長。」

精選娛聞，喺晒《娛果》
http://fb.com/appledailyent