前晚油價回落，美國有併購消息，美股就乘機造好，雖然昨日早市日股唔係升好多，但係都冇影響港股炒上嘅氣氛，因為港股技術上已經有晒條件反彈，好友梗係依計劃行事。
圖表嘅啓示都唔好話唔理，恒指抽咗上去，喺10日線之前就呆咗喺度，啲買盤好似即時失晒動力咁，冇厘火氣，就係咁樣個市中段回咗啲，不過，尾段好友再發力，恒指就升咗上全日嘅高位收市，雖然仲未升破10日線，但係就為淡友帶嚟好大嘅心理壓力，一個唔覺意昨晚美股大升，港股今日就好可能繼續挾淡倉，收市保唔保得住啲升幅已經唔重要，因為淡友已被挾得好慘，當然，單睇技術走勢，𠵱家個阻力位並唔易破。
前幾日個市回，但係啲國企股就好硬淨，唔好以為係亁炒，好多股份都係啱啱起步炒，國內個市炒到㷫烚烚，成交好勁，加埋𠵱家興睇住A股同H股個價嚟炒，呢個月啲國企股可以升到你唔信。

中石化C輪4455：早兩日已經叫大家留意中石化（386）嘅C輪，中石化啱啱做咗恒指成份股，之前升咗上嚟，回吐壓力好細，禮拜一微跌似收貨多啲，昨日炒上6.53元收市，升4.8%，破咗之前高位6.44元，下一站就係6.80元，日線圖有個「島形底」撐場，升勢會好勁，破咗6.80元，可以睇7.30元。
中石化C輪4455昨收88仙，槓桿率7.4倍（有效5.4倍），對沖值0.73，引伸波幅31.5%，掉頭回升，正股升上6.80元，4455應該唔會低過1.05元，正股升上7.30元，隻C輪應該喺1.45元樓上，呢個價買，正股跌穿6.23元止蝕。
俊樺