住喺山頂嘅朋友，呢排係咪成日見到有位男士喺麥當勞道揮手？唔關農曆七月事，望清楚就會發現佢係自由黨楊哲安（Jeremy），細個住過山頂嘅佢近排重返舊地，唔知係咪為中西區補選做好準備？只知佢因此重遇聖保羅男女小學嘅舊同學，憶當年讀書往事，41歲Jeremy自爆留英時匿喺被竇苦讀辛酸史，成績終由幾乎包尾變5科A。

咪以為Jeremy做過教育局政治助理，一定係讀書人，睇返佢小四成績表，班主任評語係「成績稍弱」，除咗科學有91分，唔少科目僅6字頭，「哈哈哈，我細個不知幾奀皮，書就唔多讀；搬去康樂園後，掛住同大哥捉蝴蝶、養雞鴨」；Penmanship同書法都係「丙+」，莫非手字好差？「係呀，阿哥都笑我啲字，中英文都似雞腸，好在有電腦救咗我！」

86年10歲仔，因為爸爸、即係前立法會議員楊孝華被調派至北京，成家人北上移居，Jeremy開始接受小班教學，「成班人得三個同學，中文同英文都唔夠菲律賓同孟加拉嘅女同學好，真係好瘀皮。」由於當時朋友少，課餘都係同大哥玩，滑冰玩遙控車等一樂也。到咗13歲，爸爸要調返香港，兩兄弟則齊齊赴英讀書，繼續「相依為命」。

Jeremy話當時自己英文好差，「例如我係會講：I don't know you say what」，當時仲要用好屎嘅英文學法文，點會唔苦，至弊香港嚟嘅同學仔，個個成績勁到暈，「我係近160人考第100零幾，曾經懷疑過排名係咪用英文名姓氏排，所以咁後？哈哈。」

由於唔衰得，開始發奮圖強，寄宿學校卻規定好早熄燈瞓覺，佢就挑燈匿入被竇夜讀，結果一步一步爬返上嚟，「由唔戴眼鏡變埋四眼仔」，拎住5條A考入牛津讀經濟，其後仲成為倫敦政治經濟學院理學碩士。畢業後喺英國做過兩年consultant，成日出差到歐洲，25歲時反思Who am I？最終決定回流香港再打拼。

16歲幫過爸爸助選嘅Jeremy，入完政府再選過區議會，佢話政治對香港人嚟講其實都好重要，希望更多人走出來關心社會。問佢回流香港有乜最大收穫？「梗係我老婆囉」，隔空都感覺到佢對太太張新悅嘅甜甜蜜！現為三女之父嘅Jeremy話會畀囡囡自由發展，盡量喺錯誤中學習，呢點都係自己喺父親身上學習。