港人滯留泰國搞出人命，煲呔政府至識死，派包機去接香港人。特區政府施政無能，管治威信再受重挫，煲呔民望沉完又沉，一班舊部仲要踩多幾腳。好似保安局前局長葉劉淑儀做咗立法會議員，噚日乘機狂鬧政府反應唔夠果斷，完全低估事件嚴重性；公務員事務局前局長王永平仲寸，整埋PowerPoint嚟數煲呔，慌佢唔死。

官場中人都知，葉劉同平叔做官時，既唔係煲呔馬房，亦同煲呔唔friend。今次出事，葉劉昔日愛將李少光要孭晒，但葉劉噚日就冇點名提李少光，淨係猛鬧特區政府，話最終都用包機接載港人返港，證明一早就做到，唔係有乜技術困難。葉劉仲話，由生果金同外傭稅問題，反映政府同民意脫晒節，今次事件再次證明，曾班子根本無法充份掌握民情，唔該檢討。
平叔仲絕，唔止鬧政府反應慢、欠市民一個交代咁簡單。佢噚日去嶺大發表題為《今日政情》嘅演講時，好有心機咁整咗個PowerPoint出嚟做presentation，將煲呔分成「昨日」、「今日」、「明日」三部份慢慢玩。

「昨日」嘅煲呔，當然不能不重提佢舊年份施政報告，當中白紙黑字寫明，政府「重視執行力」，仲揚言香港會有「更光輝嘅黃金十年」。平叔寸爆咁問：「𠵱家我哋係咪已經踏入黃金十年嘅第二年？」在場學生哄堂大笑。
平叔跟住就攞今年份施政報告出嚟，對於煲呔喺報告入面承認市民對政府信任出現「變化」，不忘點評一番，「其實『變化』係個中性詞，我覺得更加準確嘅形容詞，係『下降』。」平叔話，呢份報告提出好多問題，包括政府係咪誠實可靠、係咪能力下降、決策係咪以民意為依歸，「呢啲係特首自己提出嚟，但佢冇提出答案。」平叔呼籲，一班司局長應該三省吾身，可能有望改善管治。
平叔臨尾仲搞鬼，用幅煲呔疑似揮手道別嘅相，作為煲呔嘅「明日」。平叔話，煲呔嚟緊會點佢唔知，叫班學生自己諗。啲嶺大學生喺發問時段就一面倒鬧政府管治能力唔掂，睇嚟大家心裏面都諗，煲呔會唔會提早byebye？
mailto:[email protected]