當年今日
關於我們

【唱「無間做」成名】新戲演阿澤囝囝「劉小華」舞出色至like陳柏宇

蘋果日報 2016/01/12 06:00

蘋果香港陳柏宇跳舞即時繁忙兒童合唱團毛記分獎禮劉小華無間做

喺噚晚毛記分獎禮一夜成名,於「繁忙兒童合唱團」演出中獨唱《補充練習無間做》嘅「劉小華」(劉皓嵐),今年7歲,本身都係習「舞」之人,曾參與不少公開舞蹈比賽,其Instagram有不少練習片段,可見「劉小華」舞藝不凡,喺比賽中亦取得好成績,而「劉小華」亦曾參與電影、電視及MV拍攝,曝光率唔低。

早前劉小華就為電影《選老坐》拍攝,算係童星一名,喺戲中飾演杜汶澤兒子,同「劉小華」曾合作嘅藝人,仲有林奕匡、黃修平、陳柏宇、姜皓文等,「劉小華」嘅學業成績亦名列前茅,全班考第2全級考第8,喺學校亦活躍參與話劇。

《蘋果》致電「劉小華」媽咪,估唔到係「劉小華」聽電話,佢講嘢把聲好鬼得意好可愛,有少少尖有少少高:「我媽媽喺厠所呀,一陣再傾呀。」記者話想同你傾幾句,「劉小華」話:「0依家唔得閒,做緊功課呀。」咁幾歲呀?「劉小華」好乖巧答:「7歲。」

係咪好「繁忙」呀?佢話:「我唔補習㗎,我0依家喺屋企。」有冇學乜呀?佢話:「我學跳舞。」好鍾意唱歌?「劉小華」話:「係呀,最鍾意拍電影,因為我想做一個演員。」鍾意邊個演員?佢話:「我鍾意陳柏宇,冇點解,因為之前同佢拍過MV識咗。」識唔識劉德華呀?佢話:「唔識呀。」