大學校園內嘅港獨標語事件，竟然惹嚟一個花生小枝節。話說39位建制派議員日前向教育局長楊潤雄發聯署信，反對校園播「獨」，要求當局跟進。本來呢啲政治姿態例牌菜，建制派全面歸隊都好正常，但前晚政圈突然離奇傳出風聲，話西環契仔謝偉俊唔想簽，卻因為民建聯陳克勤唔識英文而「被簽名」，鬧出一場小風波。
謝偉俊噚日話喎，覺得呢個問題應該由學校自己討論，外界包括政府唔需要畀壓力院校，所以覺得聯署唔出好過出，咁咪回覆負責聯署嘅建制派副班長陳克勤話「I'll pass」囉！佢話可能溝通上有誤會，「佢以為pass係等於通過咁解」，當咗佢同意而加埋佢個名！

fb發文話「班長唔易做」

謝偉俊仲教大家英文，話「I'll pass」通常係解做好無奈地唔想參加，同時話唔會批評人喎，冇諗住追究，一人少一句似乎更好。
由於陳克勤有搓my breast前科，似乎真係似佢唔識英文搞出來嘅風波。但建制派有人放風為陳克勤申冤，叫大家諗諗呢壇聯署背後邊個牽頭，西風狂吹下建制派點敢唔簽？會唔會有人見勢色唔對想搵啲下台階？陳克勤噚日就喺facebook發文，自稱「躺着也中槍。經一事，長一智。」強調「建制派很應該團結一致」。之後仲hashtag「班長唔易做」、「太儍太天真？」，唔通暗示啞子吃黃連？
李八方