葉翠翠自稱因為炒股大有斬獲而買咗寶馬山賽西湖兩個單位，合共3,100萬元，一時間成為圈中熱門話題。前晚吳文忻到尖沙嘴出席一個健康食品活動時，問到一向有炒股嘅佢，覺得翠翠係咪好叻時，吳文忻就句句有骨咁暗寸對方，問到翠翠炒股炒到買豪宅，吳文忻起初好大反應咁話：「嘩，簡直……不過都係唔好咁誇張，佢咁犀利，陸叔（陳永陸）都要行開，好叻囉，佢係港姐股神，唔係師奶股神。」

吳文忻就話自己贏過但輸番晒，數目過百萬，佢話：「自己貪字得個貧，蘇民峰都叫我放，但唔聽話，如果唔係何止……。」馮仁昭問吳文忻係咪如果放咗唔止賺3,000萬？佢話：「我點炒都冇咁犀利，我唔係羨慕佢，呢啲錢咁難搵，我就搵唔到，我揼石仔就得。」
另外，陸詩韻前晚喺電視廣播城錄節目，講到袁彌明寸翠翠收入同表現唔成正比，陸詩韻話：「如果佢投資有斬獲，真係幸運又幸福，我都想請教佢，戥佢開心。」至於話翠翠吊到金龜？陸詩韻話：「我以前都俾人咁話過，唔應該只係講喺港姐身上。」
至於當事人葉翠翠噚日就喺九龍灣MegaBox出席無綫奧運花車巡遊活動，對吳文忻嘅「港姐股神」言論，佢話唔會回應，葉翠翠話：「我唔會因為人哋嘅說話就回應。」
葉翠翠又話唔會因為咁而嬲，只會繼續做，佢話：「賺錢我梗係會繼續，我會建立我嘅王國，買樓一直係我夢想。有前輩都同我講過，叫我唔好介意人哋講乜。」