近期尾市期指亂挾單邊已成例牌動作，噚日期指在現貨收市一刻仍有22800以上，到4:30收市時卻已跌至22660，不過同上星期比已經唔算離譜，港交所（388）堅持延長交易時間，呢個時候好應該同市場人士交代仲有無保留嘅必要。
由於港股成交低迷，噚日又跌至600億元以下，日前摩根士丹利發表咗一份好有趣嘅研究報告，預料港交所未來15日股價下跌（Fallinabsoluteterms），指香港股市成交額未符預期下，港交所今年盈利預測存在下調風險，維持港交所遜於大市投資評級。

大摩唱淡或有玄機

大摩原先預計港股平均每日成交額約950億元，不過實際上成交額已顯著減少，過去10天的平均每日成交額已回落至650億元，以目前疲弱市況，相信港股成交額短期內將繼續處於低水平。若成交額在今年餘下時間維持於650億元水平，港交所合理價將降至低於100元，而有關情況出現的可能性達到六至七成。
呢份報告，特別之處唔係估港交所好有機會只值100元以下，而係估佢股價未來15日再跌，講得好實在，唔係風水佬呃你十年八年嗰隻。成交低迷已唔係今日發生之事，港交所股價自5月初167元幾乎日日跌，去到𠵱家123元，勁跌44元，已反映緊成交預期。
計一計港交所股價已跌咗30多個交易日，未來15日反彈都要啩，大摩分析員卻估計其股價在未來15日會繼續下跌，照表面推論，即係對未來兩周港股成交唔多樂觀，而成交無起色，估計個市都好難大逆轉，呢個玄機，真係信不信由你。