當年今日
關於我們

童夢傳真機:童話消逝 一個時代的終結

蘋果日報 2015/02/02 00:00


【童夢傳真機(三之三)幕後篇】上月九日,無綫兒童節目被迫畫上休止符,近代兒童節目掌舵人曾廣平,為兒童節目奉獻半生,孕育了綿綿不斷的新生代,五十九歲的他只差一年便功成身退,結果退休前成為「刀下亡魂」。在這一個時代的終結,曾廣平不想再傷春悲秋,他相信勇敢面對接受現實,才是兒童節目領航員的宗旨。
撰文:楊潔雯

監製曾廣平在無綫的兒童節目組一做三十年,本來今年可以退休,可惜,去年兒童組慘被「滅門」,曾廣平被迫提早一年退休,他說:「做到六十歲退休係圓滿啲,一個好ending就梗係最好喇!公司咁做梗係有佢嘅原因,我費事揣測喇!我自己梗係覺得唔好,最好做埋退休。」
empty
兒童節目掌舵人曾廣平在無綫工作三十年,由《430穿梭機》至《放學ICU》,見證兒童節目盛世的終結。攝影:仇志德
一人之下萬人之上
曾廣平一九八五年入TVB,在林麗珍年代加入兒童組,《430穿梭機》做導演,《閃電傳真機》年代開始升做監製,直至《放學ICU》結束,所以在兒童節目組是譚玉瑛之下,萬人之上,他笑說:「我做嗰時佢已經係阿姐,因為嗰時《430》轉過嚟係得譚玉瑛,變咗佢係大家姐冇辦法,佢係較為惡嘅一個,啲人鍾意玩佢,激嬲佢,激嬲佢好開心,佢聲又大,仲係最醒!記稿唔使睇都得,你冇辦法唔服佢,咁自然佢就惡晒,所以你一NG得多佢就矋住你。」
empty
曾廣平與譚玉瑛共事逾二十年,坦言主持們都對譚十分敬畏。
empty
歷年的兒童節目孕育了不少經典主持及童星。
empty
最令曾廣平難忘的主持是朱茵,他大讚朱茵樣靚,而且工作很用心。
對朱茵仍讚不絕口
曾廣平和譚玉瑛在兒童節目組地位不相伯仲,對大家姐印象一定最深刻,他說:「佢做得最耐,佢最有經驗,啲主持都要尊敬佢,敬畏佢,佢會教你嘢!」另一個令曾廣平一見難忘的就是朱茵,事隔二十多年,他仍然對朱茵讚不絕口:「雖然佢好短時間,好似做咗六個月度,但佢太靚喇!佢一入嚟《閃電傳真機》已經好吸引,所以留唔住呀,好快被劇組邀請出去,佢個樣好靚,同埋做嘢好用心,人好好。」
監製曾廣平認為做兒童節目是一種職業,亦是一種使命,他說:「開心做到兒童節目,細路仔最開心,一路長大,有啲小演員都好大個,譬如以前細細個張預東,𠵱家做咗配音演員,有時同佢打桌球,嗰時係五歲,𠵱家高過我,好多讀完大學,做咗總督察呀!」