由韓國JTBC電視台播出、並由YG事務所楊賢碩及《PRODUCE 101》導演一手打造嘅選秀節目《MIXNINE》，於去年首播，節目由YG事務所監製及製作，並邀得YG旗下藝人，包括太陽、CL、勝利等做評委，節目已於今年1月播畢，當中最後勝出嘅少年隊TOP9成員預計會於下月出道。

不過噚日韓網卻爆出MIXNINE出道告吹嘅新聞，根據相關人士透露一眾成員一直未收到YG方面有關出道嘅行程，亦都冇提供出道要準備嘅事宜，節目播完兩個月好似石沉大海一樣，令唔少成員都擔心冇機會出道，同時有相關人士指YG近日要為旗下藝人回歸做準備，所以冇時間理MIXNINE。

對於被指MIXNINE告吹一事，YG老闆楊賢碩今日就更新Instagram，並轉載有關新聞截圖，同時留言承諾一定會達成，亦會努力，希望大家耐心等待。

另外，限定男團JBJ因為出演男版《PRODUCE 101》而大受歡迎，雖然唔可以成為頭11位練習生以男團Wanna One出道，但當中獲得排名第21至30名嘅6位練習生就另組JBJ，並只會進行7個月活動。之前JBJ亦曾來港開騷，而佢哋將下月30號解散，而喺解散前將會於下月推出新歌及舉行演唱會，當中新歌已鐵定喺下月17號推出。

更多韓流，喺晒《娛果》
http://fb.com/appledailyent