奇妙電視後日開台，佢哋希望用合家歡搶收視，除咗杜汶澤嘅《杜汶澤食住上》，仲會推出好多綜藝節目，包括由黎燕珊同曾美華主持嘅《朝拜傲媽》，節目中訪問成功嘅母親，亦都有安排圈中多對母女出遊嘅《帶阿媽去旅行2017》，希望喺周六、周日family day時間吸納觀眾留喺屋企睇電視。

《帶阿媽去旅行2017》入面其中一集，就有現年66歲李司棋同42歲女兒葉子青，佢哋去咗日本福岡，兩母女仲講到當年關係一度決裂，司棋姐曾因移民、離婚同囡囡之間出現裂痕，斷交7年。幸好最後可以修復母女情，所以佢哋呢次結伴出遊，足足等咗43年。兩母女旅程中一齊食日式大排檔，仲浸埋溫泉，拉近此距離。

「盧海鵬試咪」已經變埋網上常用嘅歇後語，但佢今次同趙海珠主持節目《放試》，鵬哥周圍出動試咪，佢有去的士台試咪，撞正扮乘客嘅沙姐林建明，也有去街巿試咪，仲吸引「三嫂」戚美珍老遠走入天水圍買餸。本月20日起逢周六晚除咗有《放試》，仲有號稱「天下第一關」嘅鄭紹康首次出鏡，主持新節目《天下第一Friend》，佢狂碌友情卡邀名媛好友，幫佢哋喺節目中完成未了心願，例如陪周汶錡跟舞王Sunny學跳舞，亦會訪問徐濠縈，秘討佢「分享症」內情。

仲有何傲芝同何傲兒呢對靚姊妹，首度合作主持《何家姊妹何家餐》，介紹名人飯堂，孖咇「食好西」，仲有走入名人嘅home sweet home，當然有到訪過林作同媽咪嘅豪宅。