五礦系喺呢轉央企國企炒重組注資，乖到不得了，坐定定唔郁，但食住大勢，遲早輪到呢系，揀隻至平，揀五礦建設（230）。
除咗五礦建設，五礦系喺中港上市嘅有五礦資源（1208）、中鎢高新（深000657）、五礦稀土（深000831）、五礦發展（滬600058）、金瑞科技（滬600390）、廈門鎢業（滬600549），以及株冶（滬600961）。五礦建設0.33倍PB，祖國同系統3至13倍PB不等，最近磅五礦資源，亦講緊0.88倍PB，五礦建設都平咗63%，系內平霸。

內房回暖前景看俏

又上邊五礦發展，啱啱喺周一停牌，話要籌劃重大事項。五礦發展搞邊科，等公佈，但呢期市場焦點，落喺央企國企重組，五礦系一樣有呢個機會。再講，五礦建設系內唯一主打內房股，所以，若果重組，集團房產旗艦角色，按理應該不變，兼有機會俾阿媽湊大。又五礦建設潛喺近六年底，現價（0.82元）得28億元市值，唔夠可潛在注資規模300億元嘅十分之一，殘到爆！
五礦建設今年頭六個月，簽約銷售額33.5億元人仔，同比增加28%。又集團到上年尾，喺珠三角地區，揸住可供發展土儲總樓面976萬平方呎，兼且佔咗集團最大part比重，亦諗到係，食住祖國房產回暖，尤其珠三角等一線領漲地區，五礦建設應該keep到有靚仔銷情，最遲去到明年，可以turnaround。煲五礦建設，係咁意以半年橫行頂1.25元做目標，現價亦講緊要翻半番，到時，集團先得0.52倍，都仲未上到過去平均0.68倍水位。

錢雋
細價股專家
本欄逢周一、三、五刊出