最近有關「80後」的新聞好似特別多，前幾日，有間地產代理做咗個調查，話80後嘅一代置業困難，所以買樓時多數會揀細價樓。半數人會買新界屋苑，但由於有家人資助，所以唔使同銀行借得太盡，按揭少過七成。
除非屋企大把，否則敏妮相信唔單止係80後，無論係60後、70後嘅朋友，初出嚟做嘢冇耐，積蓄唔多想買樓，都同家陣嘅80後面對同樣問題。就好似邱古奇前輩講，佢當年買樓都係買埋啲「灣頭灣尾」，即係好似灣仔等舊區邊陲位置，唔係中心靚位。第一次買嗰層樓得三百幾呎，全開放式設計都唔止，一入門就可跳上睡床。上咗車後就有機會樓換樓，家陣邱前輩已經住喺海景靚樓。

最緊要負擔得起

家嘅80後，同當年60後、70後唔係冇分別，60後、70後出嚟社會捱世界時，香港正值經濟起飛，同發展得最當旺嘅時間，聽啲前輩講，當年嘅加薪幅度係幾成幾成咁加上去，唔似得家陣，加幾個巴仙都要拗一輪，兼且當年，東家唔打可以打西家，大把機會。置業買樓最緊要係計自己嘅負擔水平，如果見到自己嘅薪酬不斷有得升，當然唔怕孭起層樓。
雖然話同一嚿錢，投資喺股票同喺物業，以股票較有機會獲得好嘅回報，買咗層樓，除咗供樓，仲有其他一大串支出，包括管理費、差餉地租等。不過敏妮都贊成年輕人買樓，而且越年輕越應該有呢個計劃，因為年輕人有大把時間，即使遇上風險，亦有較長時間復原。
敏妮認識一個朋友，佢同妹妹初出嚟社會做嘢，已計劃夾份買樓，當時港府仲有首次置業計劃，借錢畀啲拎唔起首期嘅人買樓，兩姊妹夾份再加首置貸款，終於「上車」。轉眼間，兩姊妹都差唔多供滿層樓。但佢哋亦面對另一問題，有機會再分享。
溫敏妮