一直以來，谷草同泥地係部份難贏馬求交代之最佳選擇，因跑開田草有表現的馬轉戰谷草多會賺到級數，當然亦有個別唔適應舟車，或谷草太多急彎難以平衡。上周三（6日）晚「勇闖者」、「放眼量」轉場以級數一擊即中係最新的例子。

大賽過後由谷草接棒，後晚（13日）有部份馬匹是刻意從田草轉場而來的。當中葉楚航馬房「軒轅齊飛」有糊叫，上仗田草1200米初上名，今次卻棄1200米選擇跳程跑一哩，以馬房恆常手法轉場、轉路程照例凶多吉少。

不過，深信此馬將例外，自上賽後並不急於再跑，反而加強備戰兼試谷草1700米閘得第二，試準才打王牌跑全無根據的一哩，明顯考馬迷眼光。

同場「神乎其技」首次渡江，連同插四班自購新馬「鵰神」以谷草作首戰，麥菲文全晚兩駒均初跑谷草；前駒今季三戰已試前試後仄準晒，剛上1600米跟前練埋氣，今次轉場應到位。

至於「鵰神」埋門一課谷閘走勢有前有後，同場對手唔算太強，只要本身有些少能耐經已夠殺。