練馬師最新版新人王係羅富全，對一代則為蘇偉賢，呢位出名表情多多之廐主，今日（24日）在師弟面前展示功架，於第四場五班1400米由羅理雅勝出「贏盡」，單Win及組合獨贏A3分別派80.5及25.5元。反觀同場羅富全的新勝馬「銘記心中」卻名落孫山。

六歲馬「贏盡」由女馬主馬素蘭持有，佢之前養過「好芝味」、「奧蘇」及「壯烈雄心」，整體成績尚不錯。「贏盡」前季起出賽，養於鄭俊偉馬房一直贏唔到最叻只跑第二，上季尾轉投蘇偉賢，跑到上仗9月10日為止，四戰仍冇交代。

不過，「贏盡」今場換上炒飯哥羅理雅，卻如脫胎換骨般，排大外檔留前鬥後，沿途近乎包尾，直至最後100米左右，從外叠如飛殺上，以勁勢脫穎而出，趕過放頭的「漸信名駒」，險勝短馬頭位，累積第17次出賽終於開齋。賽後冇乜頭髮的蘇偉賢擺pose影相時，剛巧有人在他背後行過，和蘇偉賢夾疊下，攝影師影下一幅相，看似蘇偉賢長出頭髮有新髮型，頗為有趣。

第四場前四名有熱有冷，跑第二的「漸信名駒」是43倍大冷門，搭頭馬「贏盡」構成2,217.5元巨冷Ｑ。新勝馬「電訊大炮」以熱門身份跑第三，第四名為半冷馬「永高」，四重彩派九萬一千幾。