開會係現代管理不可或缺嘅一部份。真會、假會。無時無刻不在舉行。你試吓打電話搵啲名人、紅人、大賓架，十次之中，有九次佢哋嘅秘書都會答：「Ｘ先生開緊會！」開會係最佳推搪別人嘅藉口，不過有時一啲老友真係由朝到晚開會嘅噃，旁人都唔知呢類開會忙人究竟有冇時間做實事。
開會就開會啦，冇得避；不過咁，一啲公司內部會議由大老闆主持，大老闆鍾意噴口水，扯東扯西，可以一開三小時，下屬唔敢早退，望住手錶，諗到自己寫字枱枱面堆滿文件要處理，心裏焦急，口不能言，嗰鋪辛苦法，不足為外人道；唔少人要到五點幾先至可以做實事，有乜辦法唔九點幾至放工。

主持開會，係一種學問，照足議程辦事，唔俾開會人士發言離題，言簡意賅，係好有經驗嘅主席先至辦得到嘅；如果主席或秘書處係主導人物，委員又係大忙人嘅話，開會通常在半小時之內就可以搞掂。呢日碰到一位來自倫敦嘅地產界人士，同佢講起開會之道，佢話：「我負責整個歐洲嘅地產投資計劃，經常到其他國家開會，到意大利最爽神，我有一次到羅馬開會，秘書派一叠文件之時，內有會議紀錄，我話有冇搞錯呀，今次未開會已有會議紀錄！秘書話主席一早安排好會議如何進行，所以擬好晒所有議決案，如果有人反對，請到時舉手！意大利人好可愛，明知大家飛去羅馬開會，各有各忙，唔想嘥大家時間！主席既與秘書寫定會議紀錄，我哋成班委員心領神會，每項議程都好快講掂。半個鐘頭後，我哋已經去行街、鬆一鬆咯！」
好多公家會議都係做戲嘅啫，用意大利方式開會，可以慳番唔少時間，尤其是一啲大老闆主導嘅會議，費事假民主啦，學習意大利方法便是。