新一屆區議會任期聽日開始嘞，落任議員陸續撤出工作多年嘅議辦。民主黨葵青區長亨選區嘅議員林立志今屆區選「落馬」，今日喺facebook上載辦事處門口嘅相片，留言：「舊階段今天結束，新階段即將開始」，睇怕影埋呢張相，就要拆招牌喇！

八方問過林立志，佢話落選後好多人關心佢，總結十年地區工作，都算冇白費，笑言自己一向整齊，要清理辦公室都好容易，留低嘅可能係街坊嘅人情。佢話呢幾日都有街坊去辦事處搵佢，唔少街坊更由入伙後一路睇住佢成長，要搬走當然好唔捨得，唯有老套講句：「得閒飲茶！」唔做議員，佢話都會從事返政治、地區相關工作，希望換一條跑道，有新嘅發展。