再一次嚟到「小蜜峰農莊BeeBeeFarm」，不過今次選擇過埋夜玩足2日1夜，而且節目仲超豐富，除咗摘菜餵羊升哂級之外，今次仲會夜探螢火蟲同摘荔枝，大人細路都玩得超開心。

農莊有6間大小獨立屋，我哋今次就係住呢間坐擁無敵田園景的獨立屋，有個小陽台不特止，仲可行上一層有個天台睇風景。

獨立屋超寛敞喔！三面玻璃窗非常光猛（設有防光窗簾），兩張梳化床跟些梳化坐椅。而且有雪櫃、大電視及獨立浴室，大家最關心的冷氣當然都有！連按摩椅都有，真係堅！

行出屋外有個無敵大田園景色，真的很舒服很自在。

農莊很多地方都舖滿了這些防曬網，就算天氣超熱都玩得舒服。行上天台，可以360度睇盡農莊景色。真係一望無際，平時朝九晚五咁辛苦，可以同一家人嚟到呢度真係好舒服。

在屋前面就係兔仔住的地方，可以一出門就同兔仔玩遊戲。望向右手邊就見到彈床及羊圈，仲有豬媽媽同佢啲仔女。

我哋安頓好後，佢哋就先去玩彈床跳番夠本。

玩到差唔多後，我哋就一齊集合喺教室門口，等YY叔教小朋友收割草去餵羊。小朋友可以親自拿鐮刀同埋竹籮去收割，鐮刀都比較鈍足夠用來割草又唔會有危險。

對小朋友來說，有這樣的一個小任務，落手落腳割草並親自去餵羊，俾佢哋好大的滿足感，真係好過成日打機睇電視。

然後我哋就行到去羊圈餵羊仔，隔咗一段時間，呀芊仍然唔夠膽行入去直接餵羊。哥哥就當然未驚過，我諗佢想餵獅子老虎都仲得。

屋就喺附近，餵完羊、豬就走返入屋嘆冷氣，同埋⋯⋯睇電視！算啦⋯⋯算啦⋯⋯見考完試就俾佢哋放鬆一下啦！（因為好快我哋又要開始第二個節目啦）

我好喜歡農莊玩的設施不多，因為可以讓小朋友更多時間自己去發掘探索，又可以讓大人跟小朋友更多空間相處。

放夠電又休息夠後，我哋又整裝待發去菜田摘菜，不過今次係為咗今晚嗰餐。YY叔帶我哋去摘莧菜，仲有茄子同勝瓜，同埋俾我哋自己任摘，咁樣Buffet式摘菜，今晚一定食到飽飽。

兩個走咗去繼續摘，雖然係Buffet，但係我都會教佢哋食幾多揀幾多，如果唔係就浪費啦！芊芊見到白色茄子好開心，但係鍾意摘又唔係鍾意食⋯⋯（無言）

之後兩個又抖一抖，走咗去瞓吊床，幾梳乎。搖吓搖吓，兩個真係想瞓著咁⋯⋯ 但係唞咗陣之後，兩個小農夫又要開始做嘢啦。因為最近係荔枝豐收的日子，所以YY叔就帶大家去自家種的荔枝樹去摘荔枝啦！

哥哥體驗用長較剪幫大家將荔枝剪落嚟，不過大家要小心臭屁蟲跌落嚟，原來蟲射出的尿係可以整盲人對眼。呀芊就期待住大粒大粒荔枝跌落嚟跟住執入籃。一個剪一個裝分工合作，今晚拎入房放入雪櫃做飯後甜品，雪凍嚟食仲正。

雖然話係今晚食，當然都要試下即摘即食，先夠好味啦！

之後我哋拎返先前摘的菜去洗，俾小朋友學習預備晚餐。自己一手一腳去準備，相信今晚一定會食得特別多。攪掂哂！可以返房等開飯。

晚飯及床舖會有職員來幫我哋Set好，所以呢段自由時間又可以俾我同小朋友一齊輕輕鬆鬆玩啤牌。再走出去露台打打咭睇睇風景講心事，哈哈！

有職員來替我們準備炭爐了，今晚我哋晚餐係食田園風味雞煲，仲有我哋下晝辛苦摘返嚟的蔬菜瓜類。晚餐真係超豐富！而且小朋友可以親手煮自己摘的菜，成件事實在很完美。

食飽後，我哋開始晚上最後一個節目，就係去觀賞螢火蟲啦！雖然今日天氣好好又冇雨，但係實在太大風，所以這美中不足就係遇唔到螢火蟲（途中經過都見到2-3隻）。

夜晚返到去食吓荔枝沖個涼，大家好快就瞓著。而我就特別早起身，所以睇到咁靚的日出。一早起身出去走走，人都零舍精神。看見這麼多的植物及果實，真的感受大自然的美。

昨天YY叔給了幾個「水葡萄」我哋食，味道不錯！不過又唔係真係咁多「水」。

今朝早餐係皮蛋瘦肉粥同炒麵，全部都好足料呀！食飽飽後我哋就開始第二天的活動去整砵仔糕啦！

今次仲預備咗靚靚的粉紅煲去做，而且我哋今日做的係七彩砵仔糕（因為上次做不到有點失望）。4款不同顏色的砵仔糕，你哋又估唔估到分別係咩味道？

一切預備好就放入煲內蒸20分鐘，剛好呢段時間我哋就可以準備去參加小蜜蜂導賞。

YY叔帶我哋上到山，見到好多個蜜蜂箱，所有小朋友都超期待拿出蜜蜂隔。今次有得自己拎住成個蜜蜂隔去影相，真係好緊張呀。當然緊張的係我啦...如果哥哥一唔小心跌咗落地，我哋全部人就⋯⋯

回程經過超清澈的河水要洗洗臉。最後砵仔糕都完成了，係時侯品嚐自己炮製的成果。

YY叔仲拎咗D自家製蜜糖俾大家試，真係好清甜唔涸喉。

原來農莊都養了幾隻小貓，突然來了一個弄貓環節，呢班貓奴就最開心。

最後拎砵仔糕番房慢慢嘆，再收拾行裝就完成呢2日1夜旅程，準備番屋企啦！剛好當天是父親節，這個旅程就是最好的禮物了。

呀劍評分: 10分

呀劍評語: 新界農場這麼多，就是找一個用心經營，不商業味道濃的實在很少數。我誠意推介小蜜蜂農莊，最欣賞的是整日活動安排，不會過份繁密緊張，可以真真正正的感受農莊大自然生活。

地址
八鄉錦上路元崗清潭路菠蘿山

營業時間
星期一至日( 年中無休) 7:00a.m.-7:00p.m.

收費
入場費 $30
自助午餐 $50
工作坊 (收費不同)

電話
9642-8569‬、6684-6677

交通可到:
巴士 64K號線，往返元朗(西)總站 / 大埔墟鐵路站 (於元崗村落)
巴士 251A號線，往返錦上路鐵路站 / 上村(循環線) (於元崗村落)
綠色小巴 72號線，往返元朗(泰衡街) / 雷公田(於清潭落)
紅色小巴 23號線，往返 元朗(裕景坊) /上村(於清潭落)

網址
http://www.beebeefarm.org

（以上資料更新至文章當日）

專欄作者簡介：
呀劍萬帥
最愛親子本地遊、拍下孩子喜與樂、分享生活日常事！

Facebook專頁：
https://www.facebook.com/kimfamilytravel

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland