歐洲小國塞浦路斯出事,相距逾7,000公里的港股照樣當災,恒指二萬二關一度失守。歐盟開出的救助條件相當辣,要塞國銀行向存戶徵稅最多10%,直情係打劫散戶,隨時引發暴動。條件咁苛刻,無非係「大蝦細」,如果當地國會唔通過存款徵稅,銀行體系隨時崩潰,仲要退出歐元區。
有評論認為歐盟唔會見死不救,但呢幾年歐盟已先後救助希臘、愛爾蘭、葡萄牙及西班牙,今次已經係第五國,仲頂唔頂得順?如果花太多錢救助相對重要性不高的塞國,萬一日後法國、意大利出事點算?所以魏力大膽估計,塞國將會是被遺棄的孤兒,最終脫歐並不出奇,到時引發的震盪難以估計。