【李八方online】王志民北京現身證無被燉冬菇：不辜負香港同胞對中聯辦關心
蘋果日報 2019/12/03 10:42
李八方ONLINE王志民中聯辦主任
建制派喺今屆區選議席大縮水，外界當然關注負責操盤嘅中聯辦主任王志民，係咪要人頭落地？尤其路透社早前引述消息，指北京要撤換王志民後，王志民久未露面，噚日一個研討會更甩底，由副主任盧新寧代為出席，加上上周港區人大代表葉國謙父親舉殯，未見王志民致祭嘅花圈，即時又令坊間議論紛紛。（有建制中人就話，中聯辦主任致送花圈有官式規範，故此向建制派家人致送花圈，其實唔係慣例，所以不應被視為被「撤」嘅證據喎。）
而喺坊間質疑王志民已經被「燉冬菇」之際，王志民今朝就喺北京露面，出席紀念澳門基本法頒佈二十周年座談會。同場仲有多位國家領導人，包括主管港澳事務嘅國務院副總理韓正、外長王毅、人大委員長栗戰書、中央政法委書記郭聲琨、公安部部長趙克志同港澳辦主任張曉明，粉碎咗已被撤換嘅傳聞……當然係暫時粉碎，因為北京若要換人，使預早通知咩？
王志民亦特別喺座談會後話，自己「很堅定」告訴香港朋友同記者，會同中聯辦領導班子同全體同事，繼續堅決貫徹總書記習近平重要講話精神，尤其係對方喺巴西發表關於「三個堅定不移」、「三個堅定支持」嘅重要指示精神。佢同時喺接受左報《大公報》同《文匯報》訪問時話，會同中聯辦班子繼續忠實履行中央賦予佢哋在港嘅職能，一定唔辜負香港同胞對中聯辦嘅關心、支持同期望，唔會辜負以習近平為核心嘅黨中央，一直以來對香港嘅牽掛、重視、關心同關懷，全方位為自己被「燉」闢謠。