位於九龍塘嘅鄉議局會址，一向都風平浪靜，冇試過被小偷光顧。點知上個月7號同19號唔夠兩禮拜，鄉議局竟然先後被小偷光顧兩次；雖然冇人命損失，但鄉議局就唔見咗萬幾蚊財物，包括一部手提攝錄機、四部數碼相機、一部MP3機同幾千蚊現金。最好笑係賊仔連郵票都唔放過，總計偷咗成千張郵票，夾埋二千幾蚊。
主席劉皇發就笑笑口話班賊仔一定好失望，點諗到搞一大輪先至得萬零蚊咁少錢？佢仲呼籲賊仔同行，唔好以為鄉議局好有錢，再嚟爆竊都係冇乜肉食。發叔等鄉紳決定斥資三萬幾蚊加裝防盜設施，包括加建門口圍欄，希望令鼠輩見到鄉議局三個字就掉頭走。