滙豐香港新掌舵人將於10月上場！新「一姐」係施穎茵（Diana Cesar），有別於炒房出身嘅前一姐馮婉眉（Anita），施穎茵一向掌管香港區零售銀行及財富管理業務，屬實幹、平易近人型嘅賓架。
自馮婉眉今年2月中離任，結束與獅子行近廿年賓主關係，香港區總裁呢個位一直由滙豐大中華區行政總裁黃碧娟兼任，直至噚日，集團發出內部通訊，正式宣佈由施穎茵接棒，佢會繼續兼顧零售銀行及財富管理相關業務，直至銀行公佈新嘅接任者。

1999年加入　曾主管按揭部

濠江出生嘅施穎茵，係中葡混血兒。據聞佢並非由銀行基層做起嘅典型賓架，加入銀行前，佢曾經從事電訊業，專注市務推廣，直至1999年先至加入滙豐，16年間，職位越做越高。
施穎茵曾任多個負責零售銀行業務嘅職位，好似香港銀行業務主管、亞太區存款及按揭主管，對好多零售產品都好熟悉。2011年9月，佢已經睇晒香港區零售銀行及財富管理業務。
過去幾年，佢間唔中都會主持記者會，講吓退休策劃、財富管理，呢位中葡混血兒靚女賓架好平易近人，平時都好受記者歡迎㗎。
滙豐近年想從珠三角、東盟國家及人民幣國際化尋找增長點，行內人都知道，施穎茵靚女得嚟又做得嘢，今次擢升對市場及財富產品熟悉嘅施穎茵，難免令人聯想到集團可能想回歸實務，做多啲揼石仔嘅工作，進一步鞏固零售銀行及財富管理業務。

李華華
mailto:[email protected]