李克勤最近為SGLT2糖尿病藥物拍攝代言人廣告，仲擔任糖胖症大使，向公眾同病友推廣控糖減重嘅健康訊息。熱愛運動嘅克勤，喺廣告中要打棒球、打拳、踢足球，呢啲簡單任務，對克勤嚟講，當然無難度，佢笑話：「我自己比較鍾意打拳個造型，雖然我好鍾意運動，但好少扮曹星如，我覺得幾得意，另外踢波對我難度反而高啲，因為想做好每一個動作。至於棒球真係無乜認識，要靠導演指導。」

原來克勤家中有成員患有糖尿病，所以佢對呢病都有基本認識：「拍攝前有做資料搜集，我o依家先知，原來有糖尿病又肥嘅人就係糖胖症，而10個糖尿病人當中有8個有肥胖問題。我做代言人嘅使命，就係希望用自己健康形象同影響力，提醒公眾同身邊朋友、家人，要注意糖尿同肥胖問題，尤其有肚腩嘅人，都要份外留神，小心患上糖胖症。」

要身體健康，當然要注意體重同飲食，兼要多做運動，自稱好為食嘅克勤，有時都會受唔住零食嘅引誘，佢話：「人越大越知道邊啲嘢要少食、唔好食，始終要健康為重，過口癮嘅嘢過咗就算啦喇！」

克勤又預告下半年要做「空中飛人」，為即將推出嘅國語碟到大陸宣傳，又要舉行巡唱。工作密麻麻，世界盃期間，克勤亦只係留喺屋企睇電視直播：「全家都想去俄羅斯睇波，但我只去過一次俄羅斯，對當地認識好有限，比較難安排一家大細有老有嫩嘅旅程，加上旅費好貴，所以今年同大家一樣，睇電視。」

精選娛聞，喺晒《娛果》
http://fb.com/appledailyent