潘明輝在3月26日才在港首次上陣，話都冇咁快已贏19場，贏多一場便升格減七磅。

這位綽號「火車潘」的見習生，在6月曾四度起孖，手風順到不得了。明日（7月1日）他共騎九駒，來自六個不同的馬房，其中第七場「活力小駒」有望贏馬兼捧盃。

第七場二班1400米香港回歸盃：「活力小駒」上季開始主攻1200米，評分推至100分，近兩仗都輸唔夠一馬位而跑第三，現階段跑短途總是姍姍來遲。

今次刻意增程跑1400米，三歲時在港第三次上陣已贏同程，此程肯定啱跑，6月20日試泥閘1200米，潘明輝直路捉到實，跑贏有郁手推騎今仗對手的「劍斷浪」，狀態高下立見，操足而戰鬥意堅，出擊箭頭直指今場盃賽，排2檔形勢大好，手執盃耳。

同場「赤兔寶駒」韁口重，快步速場合較容易穩定走勢，上仗跑同程前中段步速極慢，早段搶口鬥力，潘頓沿途騎得辛苦，步速形勢不合發揮，但仍能後上跑入Q，證明質素超第二班，預期今場會有正常偏快步速，形勢會有利牠後上爭勝。

「川河寶駒」5月轉到苗廐，最近一個月兩度試閘，操練程序一絲不苟，操足才上陣搏殺。

「蒙古王」上仗贏馬姿態出色，近況勇銳，今場孭少12磅，升班跑亦不能睇小。