鄭希怡（Yumiko）、前主播蔡雪瑩（Snowy） 同老公朱威霖、霍啟文等，今日喺銅鑼灣為美容公司NeoGlow主持開幕，大會送上蛋糕賀聽日37歲生日嘅Yumiko，搞到佢相當驚喜，咁啱今日係Yumiko老公生日兼結婚4周年，加埋自己聽日生日，幾個節日一齊慶祝，原來Yumiko好大頭蝦，連結婚周年都記錯，佢話：「我記性真係好差，所以就將生日、紀念日放埋一齊，唔使記錯，今日係我哋結婚周年，我自己寫咗3周年，點知有朋友問我點解時間好似過得好咁快，原來我計錯數，不過喺佢哋心目中唔出奇，最好係快活不知時日過，完咗活動就會去買禮物畀老公，不過仲未諗到買咩。」記者提議不如生多個bb做禮物，Yumiko反應好大咁話：「咁大禮？太重喇！梁浸浸成日都話要想要一個細佬，不過我哋班朋友要順番次序，應該係丁丁（應采兒）先，跟住之後先我，順時針咁去，唔可以偷步。」

提到ig最近被黑客入侵(新聞連結： https://bit.ly/2NRLHev )，Yumiko就話：「真係有啲驚，當時個腦一片空白，因為一開嘅時候所有嘢冇晒，最近仲發覺有後續，連我email都可以有密碼，好彩我有雙重認證，依家諗緊用法律途徑去處理，希望大家都要小心。」

另外，Snowy生咗一對小朋友後，依家都係忙於湊仔，提到早前同細女喺迪士尼慶祝百日宴，隔離撞正郭富城囡囡1歲生日會，Snowy話：「我都唔知佢喺度呀，如果知道我就會留耐啲啦，可以睇吓城城，不過我驚當大家知道嘅話，冇人會留喺我哋個ballroom。」

精選娛聞，喺晒《娛果》
http://fb.com/appledailyent