話記者高危,文章解釋美國有公司結合大數據與人工智能,利用軟體發展範本、框架和演算法,撰寫過百萬篇報道。揸筆搵食嘅華華,即刻搵記協主席岑倚蘭傾吓。喺傳媒行業有三十幾年經驗嘅岑倚蘭話有乜好驚,話記者最值錢係「有料爆」,報道精采內容。岑倚蘭話曾經有人講過電視台出現,電台就會消失;有互聯網,報紙會執笠,但電台同報紙咪一樣喺度,只係黃金時間已經過咗,「資料性嘅報道,當然唔夠機械人快,但係由記者所做嘅採訪、分析同文采,機械人係取代唔到」。
另一樣面臨消失威脅嘅職業就係銀行櫃位員,華華又向Banker八吓,的確越來越多客戶用電子平台,令銀行櫃位職員數目少咗。但現階段銀行始終需要有前枱職員,同客仔面對面做交易,所以短期內呢個職業唔係話冇就冇。
至於同屬高危的模特兒,業界都唔認同。名模琦琦話只要有時裝就會有模特兒,呢個係互相依存嘅行業,除非唔再有衫,否則模特兒係唔會消失。
至於Jessica C.就話,模特兒係講求個骨架,現今科技呢方面都仲未可能整到。
李華華
mailto:
[email protected]