香港眾志今個星期六會舉行一周年黨慶，唔少人都好奇，當晚有乜娛賓活動？八方問過眾志主席羅冠聰，佢好口密咁大賣關子：「我哋宜家特登變到好神秘、好神秘，但好多表演㗎」。問到佢自己有冇份表演？聰聰有啲怕醜咁笑笑口話有；至於係咪表演唱歌？佢只係話：「大家期待吓，期待吓」，一於要保持神秘喎！

至於當晚有乜嘉賓？聰聰話今次黨慶，無邀請任何大財團、大企業或者政府官員，主要都係邀請民間團體，例如「文化監暴」成員等，可惜今次「明哥」黃耀明同「HOCC」何韻詩都唔得閒到場，但「男神」王宗堯則會到場支持。

其實「文化監暴」同香港眾志關係相關密切，皆因成員之一嘅香港演藝學院電視電影學院前院長舒琪，亦係香港眾志嘅常委嚟㗎。