由宋慧喬同宋仲基主演嘅KBS新劇《太陽的後裔》噚晚播出第9集，雙宋感情線邁進一大步，仲喺劇中兩度咀嘴，播出9集已咀足4次，睇到粉絲好鬼開心。

由於劇情咁鬼sweet，收視亦再次創新高，噚晚一集收視緋於突破30%，比第8集升1.6%，錄得30.4%，繼續以大比數超越水木劇（逢周三及周四播出）其他對手，穩坐收視冠軍寶座。

近年水木劇難以突破收視30%關口，所以今次《太陽》成功突破30%收視，亦係自2012年由金秀賢同韓佳人主演嘅《懷抱太陽的月亮》之後，近4年來另一高收劇集，所以外界都預示新一齣國民電視劇將正式誕生。

至於由Rain主演嘅SBS新劇《回來吧大叔》，收視就繼續跌，跌到3.5%收視，更被上周開播、由李鎮旭、文彩媛主演嘅MBC新劇《GoodbyeMr.Black》打低，噚晚《GoodbyeMr.Black》錄得3.6%收視，以0.1%收視之差，成功進佔同檔收視第二位，Rain嘅《回來吧大叔》就包尾墊底收場。