唔夠一個月就係農曆新年,各大商場春裝相繼登場,太古鰂魚涌太古城中心,今年以「鳳凰」做布置主題,喺雞冠花中,放置兩隻十五呎高嘅鳳凰,寓意「鳳凰展翅」,祝願市民振翅高飛。
至於年年都受歡迎、高達四十呎嘅「桃花祈福樹」,一定唔少得。
另外,新地及恒基等嘅中環國際金融中心商場,除咗喺商場內擺咗棵二十呎高桃花樹,四周又放下多組人手製成嘅立體繩結裝置,總共用咗二十五萬呎棉繩。據講,織成圓形,係因為咁樣似錢幣,寓意「貨如輪轉」。
至於信和大角嘴奧海城商場,就以「百鳥朝凰迎新歲」做主題,商場內放咗隻「巨型機動孔雀」,以開屏姿態出現,寓意吉祥。
各商場裝飾擺設咁有特色,睇嚟,農曆新年消費者不愁冇節目,可以盡情消費。
馬清儀賣樓賺一半
大生地產馬氏家族成員馬清儀,○三年底樓市復甦初期,以一千六百八十萬,購入中半山曉峰閣複式,持貨一年多轉手,升值一半,勁賺八百五十萬。
消息人士話,三座頂層A,二千三呎,附平台及天台各八百幾呎,另雙車位,作價二千五百三十萬,每呎近萬。
馬清儀過去購入嘅豪宅,主要喺中半山與西貢,可能同佢家族喺呢兩區持有唔少物業有關,除咗曉峰閣,馬清儀二○○○年中,以二千二百六十萬,買入恒隆拆售嘅花園台二座高層B,每呎七千幾,估計今日至少升兩三成。
欣盛苑摸出執十萬
粉嶺居屋欣盛苑,剛剛錄得摸貨成交,A座高層八室,五百一十五呎,喺自由市場以八十五萬摸出,每呎一千六百五十,炒家唔夠一個月,執到十萬,賺逾一成三。
利嘉閣王妙婷話,欣盛苑今個月至家吓有兩宗買賣,全部係自由市場成交,平均呎價一千五百四十四。現有八十個放盤,自由市場叫價每呎千四至千六。
較早時,中原研究報告話,舊年最多二手居屋摸貨嘅屋苑正是欣盛苑,全年有五宗,估唔到○五年唔夠半個月,已經有一宗,睇嚟,呢個屋苑都幾有炒賣潛質。
測量師學會添猛將
RICS特許測量師學會,噚日頒授證書畀九個專業人士,佢哋通過專業勝任能力評核(APC),嘅專家途徑(ExpertRoute),喺舊年考取到測量師資格,係香港第一批循呢個途徑,獲得測量師資格。
呢九位新晉測量師,三個屬設施管理,其餘係項目管理;佢哋所屬公司完全唔同,較為人熟悉嘅,有富城物業管理、九廣鐵路、茂盈(亞洲),以及香港大學,但最意想唔到嘅一間,應該係香港華特迪士尼幻想工程公司,唔知同迪士尼樂園有冇關係呢?