【新增回應】

颱風山竹噚日襲港，好多人屋企爆玻璃，颱風過後又要搵路返工，四圍都係樹枝、雜物，行出門口都仲feel到危險。

但就算喺屋企清理垃圾都好，仍然係危機處處，衛詩雅今日喺facebook貼咗張相，見到三嚿石屎跌咗落地，最大一嚿長約兩呎。衛詩雅話手臂被擊中，流到成手血，嚇到不斷尖叫，佢又留言話係刧後餘生：「我以為自己拍緊災難片。」有網民都好擔心，仲叫佢最好睇下醫生，以免病菌受到感染。

詩雅接受《蘋果》電話訪問講番意外經過依然好驚：「昨晚颱風嚟嘅時候，1點幾鐘屋企開始滲水，我、媽咪同家姐喺我間房做吸水工程，同埋將啲嘢執埋一邊，突然間我感覺到好大『馮』一聲，石屎就冧落嚟，嗰刻我唔識反應，只係覺得有嘢壓住自己隻手，因為我好驚，叫媽咪快啲離開我間房，推佢哋出去，將全部人同貓狗安置晒，之後我發現隻手好痛。」

詩雅即刻洗傷口，見到成手都係血：「因為嗰刻我姐夫喺另一間房，嗰下風仲吹冧咗部冷氣機落嚟，壓到佢隻手，佢幫我睇傷口時，佢又流緊血，我又流緊血，兩個都成手血，嗰時真係好驚，感覺自己拍緊林超賢導演嘅電影一樣，好似災難片咁，真係好幸運人冇事，如果石屎跌過啲落膊頭，我諗我會斷骨，或者跌落個頭度，我諗我會有生命危險！」

昨晚詩雅喺屋企救災之餘，不斷祈禱希望唔好有人再受傷：「好好彩屋企人冇事，我嘅寵物冇事，已經好幸運，安全最緊要。我同姐夫冇睇醫生，只係自己包紮，皮外傷，姐夫手指甩咗塊肉，好慘！」屋企受山竹吹殘千瘡百孔，問到是否仍可住人？詩雅嘆謂：「依家我間房因為太爛，真係住唔到，我哋一家人蝸居其中一間房，因為好多地方爛得好緊要，比較麻煩，所以希望呢幾日好天，重建工作可以進行得快啲。」

精選娛聞，喺晒《娛果》
http://fb.com/appledailyent