現年23歲嘅徐子淇同34歲嘅恒基二少李家誠拍咗拖兩年，噚日有報道話佢哋好事近，十月會拉埋天窗。為咗叠埋心水做幸福少奶奶，子淇上周六行完珠寶騷後，就刻意保持低調，仲開始籌備年底嘅婚禮。

「我冇咁諗過」

子淇同未婚夫李家誠噚晚去咗中環出席新片《達文西密碼》（TheDaVinciCode）嘅首映，佢哋拖住手入場，大晒恩愛。問到子淇係咪十月做新娘，佢冇正面回應，只係報以好sweet嘅笑容，然後李家誠就拖住佢入場睇戲。完場後問到李家誠係咪十月結婚，佢否認話：「報道唔係真！」咁係咪訂婚先？佢又話：「我冇咁諗過！」
記者噚日打電話畀未來岳母子淇媽咪，佢對愛女婚事不置可否，仲話：「個女21歲就完全自主，佢可以決定自己嘅一切，佢結婚嘅嘢都係隨緣。」問到子淇媽咪認為未來女婿李家誠人品點樣？佢就話：「呢啲嘢我一向都唔會回應。」
據知未來老爺恒基主席李兆基都好贊成呢頭婚事，仲一擲1.8億買咗山頂施勳道「倚巒」嘅5千呎豪宅畀佢哋做愛巢㖭。